TOShKENT, 14 mar - Sputnik. Namangan shahri "Otchopar" o‘yingohida viloyat IIB tomonidan ommaviy tartibsizlikning oldini olish bo‘yicha maxsus taktik-o‘quv mashqi o‘tkazildi, deb xabar qilmoqda Namangan viloyati IIB axborot xizmati.
Tadbirda IIB, prokuratura, DXX, Milliy Gvardiya, FVB, Bojxona, Sog‘liqni saqlash boshqarmasi va hududiy bo‘limlari hamda boshqa aloqador idoralar vakillari ishtirok etishdi.
Mashq afsonasiga ko‘ra, hodisa 11-mart kuni soat 09:30 da Namangan shahar "Do‘stlik bozori" hududida ro‘y beradi. Buyumlarni xarid qilish uchun kelgan 200 nafargaga yaqin fuqarolar va chakana savdo bilan shug‘ullanayotgan tadbirkorlar bozor hududida muntazam ravishda elektr manbai o‘chirilayotganligi natijasida plastik kartalardan savdo qilish imkoni bo‘lmayotganligidan norozi bo‘lib, ruxsat etilmagan namoyishni rejalashtiradilar.
Bu haqda viloyat IIB patrul-post xizmati va jamoat tartibini saqlash boshqarmasi bataloni naradi Namangan shahar ichki ishlar organlari faoliyatini muvofiqlashtirish boshqarmasi navbatchilik qismiga ma’lum qiladi.
Yuzaga kelgan vaziyatga baho berib, hamkorlikdagi tezkor shtab boshlig‘i-Namangan viloyati IIB boshlig‘i polkovnik A.Ataxodjayev tomonidan barcha ichki ishlar organlari ma’muriy binolarini qo‘riqlash va mudofaa etilishi hamda ommaviy tartibsizliklarni oldini olish, jamoat tartibini saqlash, favqulodda holatlar sodir bo‘lganda uning oqibatlarini bartaraf etish haqida qaror qabul qilindi va maxsus kuch-vositalari orqali vaziyat bartaraf etildi.
"Yurtimizga "Navro‘z" umumxalq bayrami yakinlashib kelmoqda. Ushbu bayramda shahar-u qishloqlarda, bog‘-u xiyobonlarda turli sayillar, bayram tantanalari nishonlanadi. Namangan viloyati aholisi bayramni ko‘tarinki kayfiyat va behavotir qarshi olishlari uchun ichki ishlar organlari tomonidan jamoat tartibini saqlash, fuqarolar xavfsizligini ta’minlash borasida mas’uliyatni yana bir karra oshirish lozim bo‘ladi. Yuqoridagi kabi maxsus taktik mashqlari esa xodimlarning bu boradagi jangovar salohiyati hamda jismoniy tayyorgarligini mustahkamlaydi", - deyiladi xabarda.
