TOShKENT, 12 mar – Sputnik. Monopoliyaga qarshi kurash qo‘mitasi “UzAuto Motors” AJ tomonidan narxlarning oshirilishi bo‘yicha o‘z bayonotini e’lon qildi.
Qo‘mita xabarida aytilishiga qaraganda, UzAuto Motorsga davlat tomonidan ko‘plab imtiyozlar berilishiga qaramasdan, kompaniya ulardan samarali foydalanmagan, mahsulot tannarxi faqat 2%ga pasaytirishga erishilgan.
Ikkinchidan, kompaniyaning ichki bozordagi narxlari tashqi bozordagi narxlaridan 20-50 %gacha qimmat. Solishtirish uchun: “AvtoVAZ” AJ mahsulotlarining ichki bozordagi narxlari O‘zbekiston hududidagi narxlaridan 30-40 %ga arzon.
Uchinchidan, kompaniya tomonidan iste’molchilar huquqlari suiste’mol qilinishi holatlari ko‘plab uchrayotgani va yuqori segmentdagi avtomobillarni respublikaga import qilishda kompaniya monopoliya ustuvorligiga egaligi qayd etilgan.
Ushbu va boshqa omillarni hisobga olgan holda Monopoliyaga qarshi kurashish qo‘mitasi “UzAuto Motors” AJ tomonidan avtomobillar narxlari oshirilishi qay darajada iqtisodiy asoslanganligini va adolatli shakllanganligi aniqlash uchun korxonaning tadbirkorlik faoliyatini tekshirishga qaror qilgan. Ayni damda ushbu tekshirishni o‘tkazishga ruxsat olish ishlari amalga oshirilmoqda, deyilgan xabarda.
