TOSHKENT, 5 mar — Sputnik. Fargʻona Davlat universitetida kirish imtihonlari natijalari soxtalashtirilgan prorektor kirdikorlari fosh etildi. Bu haqda Bosh prokuratura matbuot kotibi xabar qildi.
Tergovda aniqlanishicha, ushbu oliygoh prorektori A.A. 2019-2020 oʻquv yili uchun “Jismoniy madaniyat” imtihon komissiyasining masʼul kotibi etib tayinlangan. 2019 yil iyul oyida oʻtkazilgan “Jismoniy madaniyat” fakultetiga kirish imtihonlari jarayonida komissiyaning boshqa aʼzolari bilan jami 18 nafar abituriyentlarning imtihon natijalarini sunʼiy ravishda oshirib koʻrsatgan.
Natijada ushbu abituriyentlar oliy taʼlim muassasiga oʻqishga qabul qilingan.
Taʼkidlanishicha, Fargʻona prokuraturasi tomonidan universitet prorektoriga nisbatan JKning 205-moddasi 1-qismi (Hokimiyat yoki mansab vakolatini suiisteʼmol qilish) va 209-moddasi 2-qismi “a” bandi (Mansab soxtakorligi) bilan ayb eʼlon qilingan.
