TOShKENT, 20 fev — Sputnik. Samarqand viloyatining Paxtachi tumanida oltin bilan shug‘ullanib kelayotgan yashirin sex faoliyatiga chek qo‘yildi. Bu haqda Samarqand viloyati hokimligi axborot xizmati ma’lum qilmoqda.
Qayd etilishicha, Bosh prokuratura huzuridagi Departamentning Paxtachi tumani bo‘limi tomonidan IIB xodimlari bilan hamkorlikda tezkor tadbir o‘tkazilgan.
Unda fuqaro J.U. va boshqalar “Navoiy kon-metallurgiya kombinati” DKga qarashli “Qoraqo‘ton” tog‘ tizmasi hududidan tarkibida qimmatbaho oltin moddasi bo‘lgan tosh xom ashyosini o‘g‘irlik yo‘li bilan kavlab olishgani aniqlangan. Ma’lum bo‘lishicha, ular qazilma boyliklarni o‘zlari tashkil etgan yashirin sexda qayta ishlab, oltin moddasini ajratib olishgan va o‘z manfaatlari yo‘lida sotish bilan shug‘ullanib kelishgan.
Ushbu holatlarga aniqlik kiritilgach, qo‘lga olingan shaxslardan 237 dona qoplarda tarkibida ma’lum miqdorda oltin moddasi bo‘lgan 4 tonna tog‘ jinslari ashyoviy dalil sifatida olib qo‘yilgan.
Hozirda holat yuzasidan A.U. va boshqalarga nisbatan JKning tegishli moddasi bilan jinoyat ishi qo‘zg‘atilib, tergov harakatlari o‘tkazilmoqda.
Eslatib o‘tamiz, avvalroq aynan shu tumanda qo‘lbola uslubda toshdan oltin moddasi ajratib olish sexi faoliyati oshkor qilingani xabar qilingan edi.
