TOSHKENT, 17 fev – Sputnik. Oʻzbekiston prezidenti Shavkat Mirziyoyev Turkiya Respublikasi prezidenti Rejep Tayyip Erdogʻanning taklifiga binoan 19-20 fevral kunlari mazkur mamlakatda boʻladi, deb xabar qildi prezident matbuot xizmati.
Tashrif dasturiga muvofiq, Anqara shahrida oliy darajadagi muzokaralar hamda Oʻzbekiston va Turkiya prezidentlari hamraisligida ikki tomonlama Strategik hamkorlik kengashining birinchi yigʻilishi boʻlib oʻtadi.
Siyosiy, savdo-iqtisodiy, investitsiyaviy, moliyaviy, transport-kommunikatsiya, taʼlim, madaniy-gumanitar va boshqa ustuvor yoʻnalishlarda hamkorlikning holati va istiqbollari koʻrib chiqiladi. Shuningdek, mintaqaviy va xalqaro ahamiyatga molik masalalar boʻyicha fikr almashiladi.
Prezident Shavkat Mirziyoyev Turkiyaning yetakchi kompaniyalari rahbarlari bilan uchrashadi, Turkiya Respublikasi prezidenti kutubxonasi majmuasining tantanali ochilish marosimida ishtirok etadi.
Eslatib oʻtamiz, Oʻzbekiston prezidenti Shavkat Mirziyoyev 2017 yil 25-26 oktyabr kunlari Turkiyaga tashrif buyurgandi. Muzokaralar yakunida mamlakatlar oʻrtasidagi hamkorlikning turli sohalariga doir 20 dan ziyod hujjat imzolangandi.
