TOShKENT, 12 yanv — Sputnik. Xorijda ishlayotganlarning huquqlarini himoya qilish bo‘yicha Departament qayta tashkil etildi. Tegishli prezident farmoni 10-yanvar kuni qabul qilindi.
Farmonga muvofiq, xorijda vaqtinchalik mehnat faoliyatini amalga oshirayotgan O‘zbekiston fuqarolari huquqlarini himoya qilish va qo‘llab-quvvatlash masalalari departamenti xorijdagi fuqarolarni huquqlarini himoya qilish va xalqaro iqtisodiy hamkorlik masalalari departamenti etib qayta tashkil etildi.
Departamentga bir qator qo‘shimcha vazifalar yuklatildi.
Jumladan, Departament milliy iqtisodiyotning muhim vazifalarini hal etish hamda uni barqaror rivojlantirishga qaratilgan integratsiyalashuv imkoniyatlarini kengaytirish ishlarini muvofiqlashtiradi.
Farmonga muvofiq, bir qator vazirlik va idoralar markaziy apparati tuzilmasida xodimlar umumiy cheklangan soni doirasida O‘zbekiston iqtisodiyotining jahon iqtisodiy tizimiga integratsiyalashuvi masalalari bilan shug‘ullanuvchi tarkibiy bo‘linmalar tashkil etiladi.
