TOShKENT, 5 yanv – Sputnik. O‘zbekiston Adliya vazirligi boshqarma boshliqlari oyiga o‘rtacha 15-16 million so‘m maosh oladi. Bu haqda Toshkentda bo‘lib o‘tgan konferensiyada idora rahbari Ruslan Davletov ma’lum qildi, deb xabar beradi Adliya vazirligi matbuot xizmati.
Uning so‘zlariga ko‘ra, rahbar xodimlarning bunday daromadlari bir necha qismdan iborat. yagona tarif setkasi bo‘yicha maosh; maoshga ustamalar – martaba darajasi uchun ustama, ko‘p yil ishlagani uchun ustama, shaxsiy ustama, davlat xizmatchisi sifatida belgilangan ustama; Bayramlar (Yangi yil, Xotin qizlar kuni (faqat ayollarga), Navro‘z, Mustaqillik kuni, Konstitutsiya kuni, Ro‘za hayit, Qurbon hayit) va har yarim yillik yakuni uchun mukofotlar, bir yilda bir marta ikki oylik ish haqi fondi miqdoridagi moddiy yordam; yillik mehnat ta’tili uchun to‘lanadigan mablag‘; ovqatlanish va yo‘l haqi uchun kompensatsiya.
Adliya vazirligi rahbarining so‘zlariga ko‘ra, davlat xizmatchilarining daromadlarini yashirishning hojati yo‘q - aksincha, ushbu tizim hammaga shaffof va tushunarli bo‘lishi kerak.
Yuqori ish haqi yuqori lavozimga yuqori malakali mutaxassislar, birinchi navbatda huquqshunoslar muhim lavozimlarga jalb qilinganligi bilan bog‘liq. Xususiy sektorda bunday mutaxassislar o‘rtacha 15 dan 30 million so‘mgacha maosh oladi. Davlat sektori xususiy tashkilotlar bilan raqobatlasha olishi va qimmatbaho kadrlar vazirlikdan ketib qolmasligi uchun samarali ishchilarni jalb qilish bo‘yicha davlat darajasida ishlar olib borilmoqda.
"Mehnatga haq to‘lash va xodimlarni ijtimoiy himoya qilishning zamonaviy tizimini yaratish vazirlikdagi korrupsiya xavfini kamaytiradi. Eslatib o‘tamiz, vazirlik har doim xodimlarga qancha to‘lash kerakligi haqida ma’lumot berib turadi va tizimdagi bo‘sh ish o‘rinlari tanlov asosida taqdim etiladi", - dedi Davletov.
Toshkentdagi "Umid" jamg‘armasining konferensiyasida vazirliklar va idoralar, shu jumladan Adliya vazirligi vakillari hozirda chet elda ishlayotgan yoki yashayotgan o‘zbekistonlik mutaxassislarga alohida e’tibor qaratdilar. Uzoq va o‘rta muddatli istiqbolda O‘zbekiston hukumatining vazifalaridan biri - eng samarali mutaxassislarni vatanida ishlashi va ularga qulay raqobatbardosh moliyaviy sharoitlarni yaratish uchun jalb qilishdir.
