TOSHKENT, 23 dek – Sputnik. Nukuslik oʻqituvchi firibgarning Nigeriyadagi hisobiga 165 mln oʻtkazdi va firibgarning qurboniga aylandi.
IIVning “Postda.uz” nashrining xabar qilishicha, Nukus shahridagi maktablardan birida oʻqituvchi boʻlib ishlaydigan G.P. internet tarmogʻi orqali Mark Robert ismli shaxs bilan tanishib qoladi. Notanish shaxs unga AQShdagi nufuzli kompaniyaga ishga kiritib qoʻyishini aytib, ishonchiga kiradi.
Fuqaro iyun-avgust oylari mobaynida hujjatlar, viza, yoʻlkira va boshqa “xarajatlar” uchun jami 165 million 323 ming soʻm pul mablagʻini xalqaro pul oʻtkazmalari orqali Nigeriya davlatidagi hisob raqamlariga oʻtkazib yuboradi. Ammo firibgar bergan vaʼdasining ustidan chiqmaydi.
Ayni paytda jinoyatni sodir etgan shaxsni aniqlash va ushlash choralari koʻrilgan.
Holat yuzasidan jinoyat ishi qoʻzgʻatilgan.
