TOShKENT, 7 noya – Sputnik. Tojik-o‘zbek chegarasidagi “Ishqobod” chegara postiga hujum qilgan jangarilar barchasi Tojikiston fuqarolari bo‘lgan, deb ma’lum qildi Tojikiston IIV matbuot kotibi Umarjon Emomali. Sputnik Tojikiston xabariga asosan.
“Hozirgi vaqtda Bosh prokuratura ushbu ish bo‘yicha tergov o‘tkazmoqda. Shu kun yakuniga qadar guruhning barcha a’zolarining shaxsi to‘liq aniqlanadi. O‘ldirilgan va qo‘lga olingan orasida bir nechta ayollar ham bo‘lgan”, - deb qo‘shimcha qildi IIV vakili.
Tojikiston kuch ishlatar idoralari 50 %ga jangovar shaylikka o‘tkazilgan.
Eslatib o‘tamiz, 6-noyabr kechasi 20 ga yaqin qurollangan niqobli kishilar Dushanbedan 60km masofada, o‘zbek-tojik chegarasida joylashgan "Ishqobod" postiga hujum qilib, u yerdan 5 ta avtomat o‘qotar qurolni egallab olishgan edi.
O‘tkazilgan maxsus operatsiya natijasida jangarilarning 15 nafari yo‘q qilinib, 5 tasi qo‘lga olingan.
Milliy xavfsizlik davlat qo‘mitasi xabariga ko‘ra, qo‘lga olingan "ID" jangarilari ular teraktni rejalashtirishganini tan olganlar. Ayni vaqtda hodisa yuz bergan joyda tezkor-tergov guruhi tuzilgan, tergov ishlari olib borilmoqda.
