TOShKENT, 4 noya - Sputnik. Yugurish - bu tana salomatligi. Yugurish - bu yashash, dedi Samarqandda o‘tkazilgan xalqaro yarim marafon tadbiri davomida Sputnik O‘zbekiston muxbiri bilan suhbatda O‘zbekistonning birinchi marafonchi ayoli Lyudmila Muzafarova.
Yetmish yoshni qarshi olgan Lyudmila Muzafarova yettinchi sinfdan boshlab yengil atletika bilan shug‘ullangan. "Tezlikka qiziqishim kuchli edi", deydi u.
Yugurishni 5 kilometrdan boshlagan sportchi, vaqt o‘tib, 10 va 21 kmlik masofalarni ham "zabt etadi". 1983-yil Shahrisabzda esa 42 kilometrga yugurgach, O‘zbekiston tarixida birinchi marafonchi ayol nomiga sazovor bo‘lgan.
Muzafarovaning aytishicha, yaqinda, sentabr oyi oxirida Moskvada o‘tkazilgan marafon musobaqasida ikkinchi o‘rinni egallagan va oradan bir hafta o‘tib, Moskva viloyati Korolov shahrida yarim marafon musobaqasida qatnashib, birinchilikni qo‘lga kiritgan.
Aytishicha, organizmi to‘liq o‘zini tiklab olishga ulgurmagani tufayli, Samarqanddagi xalqaro xayriya yarim marafonida 10 kmlik masofaga yugurishga qaror qilgan.
O‘zbekistonning yetmish yoshli faxriy sportchisi barcha yoshlarga sportga muhabbatli bo‘lish, mehnatsevar va tirishqoq bo‘lishlikni tiladi. "Sport bu sog‘lik, sport - bu hayot, sport - bu harakat. Yuguring, hammadan birinchi bo‘ling", deya xayrlashdi u.
