TOShKENT, 15 okt – Sputnik. Pavlodar shahridagi savdo markazida hojatxonada qizlarga telefon va oyna yordamida yashirincha qaragan fuqaro qo‘lga olindi. Bu haqda Sputnik Qozog‘iston xabar qildi.
Xabarda aytilishicha, 12-oktabr kuni noma’lum shaxs kichik oynacha yordamida hojatxonada 9 yoshli qizchaga qaragan. Ushbu holat aks etgan video tarmoqda tarqaldi.
Seshanba kuni politsiya vuayeristni qo‘lga oldi (bu yalang‘och odamni yashirincha tomosha qilishdan zavq oladigan inson). U 1968-yilda tug‘ilgan O‘zbekiston fuqarosi ekanligi va Pavlodardagi restoranlardan birida oshpaz bo‘lib ishlashi ma’lum bo‘ldi.
“Ushbu holat yuzasidan Jinoyat kodeksining 124-moddasi voyaga yetmaganlarni ahloqsizlikka o‘rgatish moddasi bo‘yicha surishtiruv olib borilmoqda. Hozirgi vaqtda gumonlanuvchiga nisbatan ehtiyot chorasini qo‘llash masalasi hal qilinmoqda”, - deyilgan politsiya xabarida.
Bu moddada besh yildan o‘n yilgacha ozodlikdan mahrum etish jazosi nazarda tutilgan.
