TOShKENT, 11 okt – Sputnik. Qozog‘iston prezidenti Kasim Jomart Tokayev "Shengen" kabi MDH mamlakatlariga yagona vizalarni joriy etish masalasini ko‘rib chiqishni taklif qildi. Buni Qozog‘iston yetakchisi Ashxoboddagi MDH a’zo davlatlar rahbarlari kengashi yig‘ilishida aytdi. Sputnik Qozog‘iston xabariga asosan.
“Afsuski, milliy viza va migratsiya tartibotlarida turli farqlar saqlanib turibdi. Ular bir vaqtning o‘zida bir necha MDH davlatlariga tashrif buyurmoqchi bo‘lgan xorijiy sayyohlar uchun noqulayliklar tug‘dirmoqda. Men tushunaman, albatta, bu qiyin, ehtimol shingen shartnomasi shaklidagi “hamdo‘stlik vizasi” shartli nomlanishdagi MDHda yagona tartibotni joriy etishni ko‘rib chiqishimiz zarur”, - dedi Tokayev.
Bunday viza hamdo‘stlik mamlakatlarda turizmni rivojlantirishga yordam berishi mumkin.
Tokayevning so‘zlariga ko‘ra, har bir mamlakatda butun dunyodan sayyohlarni jalb qila oladigan noyob tabiiy va tarixiy joylar mavjud.
“Osiyo shengeni”
2018 yil iyunida Dariga Nazarbayeva Markaziy Osiyo davlatlari uchun “Osiyo shengeni” yaratish g‘oyasini e’lon qilgandi. Bu loyiha 2019-yil boshida ro‘yobga chiqarish rejalashtirilgandi. Biroq, Qozog‘iston TIV ma’lumotlariga ko‘ra, “osiyo shengeni”ni yaratish va joriy etish uchun ko‘proq vaqt talab etadi.
