TOShKENT, 23 sen - Sputnik. Rossiyaning Sankt-Peterburg shahridan O‘zbekistonning Namangan shahriga parvozni amalga oshirayotgan samolyot Samarada favqulodda qo‘nishga majbur bo‘ldi. Bu haqda RIA Novosti xabar qildi.
Qayd etilishicha, uchuvchilar yo‘lovchilardan birining tobi qochib qolgani sabab qo‘nishga majbur bo‘lishgan. U6 2509 reysi Kurumoch xalqaro aeroportiga favqulodda qo‘ngan.
“Favqulodda qo‘nishning sababi – samolyot bortida bo‘lgan 1988-yilda tug‘ilgan, gipertoniya (qon bosimining oshib ketishi) xastaligidan aziyat chekuvchi O‘zbekiston fuqarosining ahvoli yomonlashgani”, - deyiladi xabarda.
Yo‘lovchi ayolga zaruriy tibbiy yordam ko‘rsatilgan va zudlik bilan shahar kasalxonalaridan biriga yotqizilgan.
Xabarda favqulodda qo‘ngan samolyot parvozni davom ettirish uchun uchib ketganligi qo‘shimcha qilingan.
