TOShKENT, 15 sen — Sputnik. Rossiyada kelgusi yildan boshlab iqtisodiyotning qator tarmoqlarida chet ellik ishchilar ulushini qisqartirishmoqchi. Bu haqda RF Mehnat vazirligi axborot-xizmati ma’lum qilgan.
Tegishli loyiha ijtimoiy-mehnat munosabatlarini tartibga solish bo‘yicha o‘tkazilgan navbatdagi yig‘ilishda ma’qullangan.
"Rossiyaning ijtimoiy-mehnat munosabatlarini tartibga solish bo‘yicha uchoqlama komissiyasi yig‘ilishida RF hukumatining "2020 yilda RF hududida iqtisodiyotning alohida turlari bo‘yicha faoliyat olib boruvchi xo‘jalik subyektlari tomonidan ishlatiladigan chet ellik ishchilar ulushini belgilash to‘g‘risidagi" qarori ma’qullandi", - deya aniqlik kiritildi idorada.
Loyiha migrantlar uchun 2019-yilda o‘rnatilgan normani saqlab qolishni taklif etadi. Ammo qurilish vazirligi taklifiga ko‘ra, Amur viloyati, Buratiya va Moskvada chet-ellik ishchilar kamayishi kutilmoqda.
Dog‘iston uchun 2020-yilda qurilish sohasida migrantlar ulushi alohida o‘rnatiladi va 50%ni tashkil etadi.
Shuningdek, Rossiya Qishloq xo‘jaligi vazirligi butun davlat miqyosida sabzavotlarni yetishtirish sohasida ham migrantlarning ulushini belgilashni taklif etdi.
Ta’kidlanishicha, migrantlar ulushining belgilab qo‘yilishi mehnat bozorining regional xususiyatlarini inobatga olgan holda ishchi kuchini jalb etishga hamda avvalo rossiyaliklarning ishga joylashishi ustuvorligini ta’minlashda yordam beradi.
