TOShKENT, 5 avg - Sputnik. Axborot va ommaviy kommunikatsiyalar agentligi rahbari Komil Allamjonov Alter Ego᾽ga bergan intervyusida u prezident matbuot xizmati rahbari sifatida ishlagan vaqtida Shavkat Mirziyoyevning odatiy ish kuni qanday ko‘rinishda bo‘lgani to‘g‘risidagi savolga javob berdi.
Uning ma’lum qilishicha, prezidentning ish kuni u uchun tayyorlagan dayjestlar, turli xil ma’lumotnomalar bilan tanishishdan boshlanadi, keyin qabullar, uchrashuvlar, yig‘ilishlar, jadval bo‘yicha boshqa tadbirlar bilan kechadi.
“Ertalab soat 9-9:30 da ish boshlanadi va qachon tugashi noma’lum. Biz doim: “O‘zingizni ehtiyot qiling, juda ko‘p ishlayapsiz”, deb ko‘p aytardik. Kun shu ishlar bilan davom etardi va biz uyga juda kech qaytardik, dam olish kunlarisiz ishlardik”, - deydi Allamjonov.
Suhbatdoshining nega dam olish kunlarisiz, degan savoliga: “Menimcha, yig‘ilib qolgan muammolar tinchlik va bo‘shashishga imkon bermasdi”, - deya javob qaytardi.
Allamjonov bu savol energiya bilan bog‘liqligi, darhaqiqat, hammani prezidentning bunchalar serg‘ayrat inson ekanligi hayratlantirishini ta’kidladi.
“Biz ularning ortlaridan ulgurolmasdik. Prezidentimizdan yosh bo‘lsam-da. Juda qattiq charchadim. Ular shu qadar g‘ayratlilarki, menga o‘xshaganlarning 10 tasi yarim yo‘lda qolib ketadi. Ayniqsa, viloyatlarga safarga borganda. Soat 8:30 da aeroportda bo‘lishimiz kerak edi. Buning uchun soat 6:30-7:00 da uyg‘onish zarur. Yarim soat ichida biz, 8:30 da — Prezident kelardi. Samolyotga o‘tirib uchamiz. Samolyotdan tushishimiz bilan kortejga o‘tiramiz va qilinadigan ishlarning rejali dasturi juda zich tuzilgan bo‘ladi”, - deya tan oladi Allamjonov.
Uning so‘zlariga ko‘ra, prezident hatto yo‘lda o‘tgan har bir daqiqani samarali foydalanishni talab qiladi.
“Siz tasavvur qilolmaysiz, biz hatto suv yoki choy ichmaymiz, ovqatlanmaymiz, dam olmaymiz — trapdan tushishimizdan, obyektlarga borishni boshlagandan to tunggi 12 gacha ishlarni tugatmagunimizcha”, - deydi u.
“Buni tasavvur qila olasizmi? Biz holdan toyamiz, prezident esa hali tetik. Prezident xalqimiz bilan muloqot qilganda odamlarning muhabbatlari va qo‘llab-quvvatlashlarini his qilib, kuchga to‘lsalar kerak. Bu esa ishlashga rag‘bat beradi. Obyektlarga borib kelgandan so‘ng, 3-4 soat davom etadigan yig‘ilish boshlanadi. Unda muhim va dolzarb masalalar hal qilinadi. Tunggi soat 12 da majlisdan chiqamiz, charchaganmiz va prezident esa tetik holda 10-15 daqiqa tamaddi qilib, televizor orqali yangiliklarni kuzatadilar, matbuotni o‘qiydilar. Mana shunday aqlbovar qilmas rejim”, - deya fiklari bilan o‘rtoqlashadi Allamjonov.
Eslatib o‘tamiz, Komil Allamjonov 2017-2018 yillarda davlat rahbarining matbuot kotibi sifatida faoliyat yuritgan.
