TOSHKENT, 26 iyul — Sputnik. Shavkat Mirziyoyev Samarqandga tashrifi davomida Oqdaryo tumanidagi Pure milk Oqdaryo fermer xoʻjaligi dalasida boʻlib, mirishkorlar bilan suhbatlashdi. Bu haqda davlat rahbari matbuot xizmati xabar qildi.
“Qanday qilib odamlarning daromadini oshiramiz, degan savol meni har kuni qiynaydi. Buning uchun har bir hudud, har bir sohada imkoniyatlar bor. Qishloq xoʻjaligida – yangi texnologiyalarni joriy qilib, hosildorlikni oshirish, xomashyoni qayta ishlash. Qayta ishlash boʻlsa, daromad, ish oʻrni koʻpayadi”, - dedi Mirziyoyev.
Qayd etilishicha, paxtachilik va chorvachilikka ixtisoslashgan mazkur fermer xoʻjaligining maydoni 1 ming 360 gektarni tashkil etadi. Gʻoʻzani tomchilatib sugʻorish joriy etilgan.
Mirziyoyev Samarqandga joʻnab ketdi
Davlat rahbari qolgan xoʻjalik va klasterlar yerini ham tomchilatib sugʻorishga oʻtkazish, hosildorlik past maydonlarda gʻallani qisqartirib, daromadi undan yuqori meva-sabzavotlar ekish, fermer va klasterlar uchun minitexnologiyalar yetkazib berish boʻyicha koʻrsatmalar berdi.
Eslatib oʻtamiz, avvalroq Shavkat Mirziyoyev Samarqand aeroportini rekonstruktsiya qilish boʻyicha koʻrsatmalar bergani haqida xabar qilgan edik.
