TOShKENT, 22-iyun - Sputnik. O‘zbekiston poytaxtida "Yoshlar kuni" doirasida, 20-30 iyun kunlari, Toshkent shahar hokimligi tomonidan 20 ga yaqin yirik ommaviy-ko‘ngilochar tadbirlar, festival va marofonlar, turli yoshlar aksiyalari o‘tkaziladi. Bu haqda hokimlik matbuot xizmati xabar qildi.
Jumladan, mehribonlik, muruvvat uylari hamda kam ta’minlangan oila farzandlari, imkoniyati cheklangan yoshlar uchun bayram dasturxoni yozilishi, mahallalardagi kam ta’minlangan oila farzandlariga o‘quv qurollari, kiyim-kechaklar, shirinliklar tarqatish aksiyalari o‘tkazilishi, kam ta’minlangan yoshlarning nikoh to‘ylarini o‘tkazish hamda "Yaxshilik albatta qaytadi" shiori ostida ommaviy qon topshirish aksiyasini tashkil etish ko‘zda tutilgan.
Shuningdek, Toshkent shahrining barcha tumanlarida 29-30 iyun kunlari "Hokim va yoshlar" uchrashuvi tashkil etiladi, yoshlar muammolari bo‘yicha hokim qabullari o‘tkaziladi.
30 iyun kuni Toshkent shahar hokimligida "Mard o‘g‘lon" davlat mukofotini tantanali topshirish marosimi o‘tkaziladi.
Madaniy-ko‘ngilochar yo‘nalishda zamonaviy yosh musiqa ijrochilari ishtirokida "I love music" festivali, 27-30 iyun kunlari Toshkent shahrining barcha tumanlardagi madaniyat va istirohat bog‘larida hamda hiyobonlarda "Yoshlar sayllari", 29-iyun kuni "Youth Day" nomli ommaviy yugurish marafoni o‘tkaziladi.
29 iyun kuni Xalqlar do‘stligi maydonida "Musiqa - jangovar safda" shiori ostida Markaziy harbiy orkestr konserti, 30-iyun kuni "Yoshlar-karting" ommaviy-sport musobaqalari, 29-30 iyun kunlari poytaxt yoshlariga bayramona kayfiyat ulashish maqsadida "Toshkent seni sevadi" shiori ostida Sayilgoh ko‘chasi va Xalqlar do‘stligi maydonida "Youth Day" gala-konsertlari, 30-iyun kuni "Humo" muz saroyida "Yoshlar simfonik orkestri"ning "Yoshlar kuni"ga bag‘ishlangan konserti o‘tkaziladi.
Eslatib o‘tamiz, 30-iyunni "Yoshlar kuni" sifatida nishonlash taklifi O‘zbekiston prezidenti Shavkat Mirziyoyev tomonidan 2017-yilda o‘tkazilgan "Kamolot" qurultoyi ilgari surilgan edi.
