TOShKENT, 22-may – Sputnik. Xitoyda mamlakat qonunchiligini buzganlik uchun hibsga olingan O‘zbekiston fuqarosiga yordam ko‘rsatildi. Bu haqda TIV xabar qildi.
O‘zbekistonning Shanxay shahridagi (Xitoy) Bosh konsulxonasi xabariga ko‘ra, O‘zbekiston fuqarosi X.Mahkamov 2019-yilning 17-may kuni Xitoydan uchib ketgan.
Xabarda qayd etilishicha, ilgari u Chanchjou (Szansu provinsiyasi) politsiyasi tomonidan qo‘lga olinib, mamlakatga kirish va chiqish tartibi to‘g‘risidagi qonunni buzganligi – muddati o‘tgan viza bilan Xitoy hududida bo‘lib turgani uchun qamoqqa olingan edi.
“Bosh konsulxona masalaga aralashuvi natijasida Xitoy tomoni hukumat idoralari uni vataniga qaytarish to‘g‘risida qaror qabul qildi”, - deyiladi vazirlik xabarida.
Eslatib o‘tamiz, avvalroq O‘zbekiston TIV fuqarolarga muhim ogohlantirish bilan chiqqan edi.
