TOShKENT, 14-may – Sputnik. Tojikiston hukumati moliya, soliq, bojxona, bank sohalari amaldorlarining malaka darajasi va daromadini tekshirib chiqadi.
Buning uchun maxsus vakolatli komissiya tashkil qilinadi. Iyun oyida mansabdor shaxslar attestatsiyadan o‘tkaziladi.
Eslatib o‘tamiz, 10-may kuni Tojikiston prezidenti Emomali Rahmon moliya, soliq va bojxona xizmati xodimlari bilan yig‘ilish o‘tkazdi.
Prezident ushbu tarmoqlarda xizmat qiluvchi xodimlar orasida korrupsiya holatlari ko‘payganini ko‘rsatib o‘tdi.
Prezident ushbu masalada tartib o‘rnatish yuzasidan mamlakat bosh vaziri Koxir Rusulzodaga topshiriq berdi. Rahmon bu tizimlarni “elakdan o‘tkazish” kerakligini alohida ta’kidlab o‘tdi.
Rahmon amaldorlarni attestatsiyadan o‘tkazish bo‘yicha komissiya tuzishni taklif qildi. Komissiya xodimlarning daromad deklaratsiyalariga e’tibor qaratadi.
Tojikiston prezidenti so‘zlariga ko‘ra, Korrupsiyaga qarshi idora, Moliya vazirligi, Soliq qo‘mitasi va Bojxona xizmati xodimlari o‘ziga tegishli bo‘lgan mol-mulklarni yashirmoqda.
