TOShKENT, 26 apr – Sputnik. 1966 yil 26-aprel kuni Markaziy Osiyodagi eng kuchli yer qimirlashi sodir bo‘ldi. Bugun butun O‘zbekiston 53-yil oldin sodir bo‘lgan fojiani yodga oladi.
Rixter shkalasi bo‘yicha 5,2 ballni tashkil qilgan yer qimirlashi markazi yer sathiga birmuncha yaqin (3-8 km) joylashganligi tufayli yer ustida 8-9 balli yer qimirlashiga olib keldi. Uning oqibatida Toshkent markazidaga 10 kv kilometr hududga jiddiy zarar yetdi. Shahar chekkalarida esa yer qimirlashi kuchi 6 ballni tashkil qildi. Yer qimirlashi 10-12 sekund davom etdi.
Tabiiy ofat natijasida, 300 mingga yaqin kishi boshpanasiz qoldi. Yuzlab shaharliklar bir necha oy davomida harbiylar palatkalarida yashadi, maktab, bolalar bog‘chalari, kutubxonalar ham xuddi shunday tartibda ish olib bordi. O‘sha kunlarda "titrasak ham, taslim bo‘lmaymiz" ko‘pchilikning shioriga aylangan edi.
"Quturgan tuya ustida yetti oy" — 1966-yilning bahor-yoz mavsumida sodir bo‘lgan mudhish hodisani toshkentliklar aynan shunday nomlaydilar.
Toshkentliklar o‘sha vaqtda misli ko‘rilmagan mardlik va jasorat ko‘rsatishdi.
Ushbu tabiiy ofat sovet xalqining hamdardlik va do‘stlik ramziga aylandi. Yer qimirlashidan keyin sovet ittifoqining barcha respublikalaridan qurilsh texnikasi, dori-darmon, sanoat va oziq-ovqat mahsulotlari ortilgan poyezdlar kela boshladi.1966 yilning qish mavsumiga kelib, boshpanasiz qolgan kishilar turar joy bilan ta’minlandi, 3-yil ichida 1 million kvadrat metr turar joylar barpo qilindi, shahar o‘zini to‘liq tiklab olishi uchun esa 10-yil vaqt ketdi.
Toshkent zilzilasi arxitektura va kinematograf olamida abadiy muhrlandi.
1970 yil 20-mayda shahar markazida haykaltarosh Dmitriy Rabichev ishi bo‘lgan “Jasorat” haykali ochildi. Har yili u yerda gullar qo‘yish marosimi bo‘lib o‘tadi.
