TOShKENT, 19 apr – Sputnik. “Toshkent shahrida Adju universitetini tashkil etish bo‘yicha qo‘shimcha chora-tadbirlar to‘g‘risida” hukumat qarori loyihasi tayyorlandi.
Loyihada ta’kidlanishicha, O‘zbekiston Respublikasi Oliy va o‘rta maxsus ta’lim vazirligi va Adju universiteti (Koreya Respublikasi) o‘rtasida Adju universiteti ta’lim dasturlarini joriy qilish to‘g‘risida Kelishuv loyihasi ishlab chiqilgan.
“O‘zbekiston Respublikasi Moliya vazirligi Vazirlar Mahkamasining zaxira jamg‘armasi mablag‘lari hisobidan Toshkent shahrida Adju universitetini tashkil etishda Adju universiteti (Koreya Respublikasi)ga dastlabki konsultatsiya ishlarini bajarishi uchun to‘lovni amalga oshirish maqsadida Oliy va o‘rta maxsus ta’lim vazirligiga 2,1 mln. AQSh dollari ekvivalenti miqdorida konvertatsiya xarajatlarini inobatga olgan holda O‘zbekiston Respublikasi Markaziy bank kursi bo‘yicha mablag‘ ajratsin”, - deyilgan hujjat loyihasida.
Shuningdek, Adju Universitetiga o‘tkazib beriladigan 2,1 mln. AQSh dollari ekvivalenti miqdoridagi mablag‘ soliqqa tortish obyekti emasligi belgilab qo‘yilishi qayd etilgan.
Adju universiteti Janubiy Koreyaning Suvon shahrida joylangan. Universitet 1973-yilda tashkil etilgan. Ushbu oliygoh texnika, tibbiyot va axborot texnologiyalari sohalariga ixtisoslashgan. Universitetda xorijiy tinglovchilar uchun shifoxona faoliyat ko‘rsatadi.
