TOShKENT, 9 mar — Sputnik. Shri-Lankada jallodlik bo‘sh ish o‘rniga berilgan e’lon qisqa vaqt ichida 102 kishining e’tiborini tortdi, deb xabar qildi Reuters mahalliy qamoq xizmati vakiliga tayangan holda.
Ushbu e’lon mahalliy hukumat narkotik moddalar savdosi uchun o‘lim jazosini qayta tiklash haqidagi qarorni qabul qilgach e’lon qilingan edi.
"Nomzod yoshi 18 yoshdan 45 yoshgacha bo‘lishi, u yaxshi axloq, o‘tkir aql va stresslarga chidamli bo‘lishi lozim. Ushbu vakansiyaga qiziqish bildirganlar orasida AQSh fuqarsi ham bor edi. Ammo uning nomzodi ko‘rib chiqilmadi, chunki jallod faqatgina Shri-Lanka fuqarolari orasidan tanlab olinadi", - deyiladi xabarda.
Shri-Lankada o‘lim jazosi qariyb 43-yildan buyog‘iga amalga oshirilmagan, ammo sudlar qotillik, nomusga tegish va narkotik savdosida aybdor deb topilgan shaxslarni ko‘plab marotaba oliy jazoga hukm qilganlar. Va so‘ngra insonparvarlik nuqtayi-nazaridan o‘lim jazosi umrbod qamoq jazosiga almashtirilgan.
