TOShKENT, 26 sen – Sputnik. NATO hozircha Afg‘onistondan chiqish imkoniyatini ko‘rib chiqqani yo‘q, u mahalliy kuchlarni qo‘llab-quvvatlashda davom etmoqda, chunki ketish bahosi ishtirokni saqlab qolishdan ko‘ra qimmat bo‘lar edi, deb bayonot qildi chorshanba kuni alyans bosh kotibi Yens Stoltenberg.
Brusselda 11-12 iyul kunlari bo‘lib o‘tgan, "Qat’iy ko‘mak" missiyasiga hissa qo‘shadigan NATOga a’zo mamlakatlar va hukumatlar rahbarlari hamda sheriklar ishtirokidagi sammitida afg‘on xavfsizlik kuchlarini moliyalashtirishni 2024-yilga qadar uzaytirish qarori qabul qilingan edi.
"Biz ketish bahosini, qolish bahosi bilan solishtirganimizda, shunday xulosaga kelamizki, chiqish bahosi hamisha baland bo‘ladi. Chunki, agar biz hozir Afg‘onistondan ketsak, u holda Afg‘onistonga toliblar ham, "ID" ham qaytishiga tayyor turishimiz kerak. "ID" Suriya va Iroqda yo‘qotgan "halifat"ni Afg‘onistonda tiklashga harakat qilar edi. Ya’ni, biz ketsak, yakun mana shunday bo‘lishi ehtimoli yuqori", — deb bayonot qildi Stoltenberg Nyu-Yorkda.
Stoltenbergning chiqishi videosi NATO matbuot-xizmati tomonidan tarqatilgan.
Alyans Bosh kotibi so‘zlariga ko‘ra, "Afg‘onistondan chiqishning yo‘li - siyosiy yechimga kela olishga qodir bo‘lishdir", shu bois NATO mamlakat prezidentining toliblar bilan muloqotga qaratilgan tinchlik bo‘yicha tashabbuslarini qo‘llab-quvvatlaydi.
"Biz Afg‘onistonda keragidan ortiq qolmaymiz", — deb qayd etgan Stoltenberg, "alyans qancha kerak bo‘lsa, shuncha qolishini" qo‘shimcha qilgan holda. U xalqaro terrorchilarning mamlakatga qaytishlariga yo‘l qo‘yilmasligini aytgan.
Afg‘onistonda hukumat kuchlari va "Tolibon" radikal harakati kuchlari o‘rtasida kurash ketmoqda. So‘nggi ma’lumotlarga ko‘ra, toliblar mamlakat hududining 50%i ustidan nazorat olib boradi. Shu bilan birga Afg‘onistonda "Islom davlati" terrorchilik guruhi ham o‘z ta’sirini kuchaytirmoqda.
