TOShKENT, 26-iyun — Sputnik. Harbiy xizmatchilarning farzandlarini kvota asosida o‘qishga kirishi uchun tavsiyanomalar berish tartibi to‘g‘risidagi nizom tasdiqlandi, deb xabar qildi Sputnik O‘zbekiston muxbiriga Mudofaa vazirligi matbuot-xizmati.
Unga asosan tavsiyanomalar quyidagi harbiy xizmatchilarga beriladi:
— Mamlakat mudofaa qudratini mustahkamlashga munosib hissa qo‘shgan, jangovar-xizmatda va ilmiy faoliyatda muayan natijalarga erishgan O‘zbekiston Respublikasi Qurolli Kuchlari tarkibiga kiruvchi vazirliklar (idoralar)ning haqiqiy xizmatni o‘tayotgan ofitserlariga, serjantlar va oddiy askarlar tarkibiga mansub bo‘lgan kontrakt bo‘yicha harbiy xizmatchilarga — bevosita komandirlari (boshliqlari) tavsiyanomasiga asosan ular farzandlarining oliy ta’lim muassasalariga o‘qishga kirishi uchun;
— Harbiy xizmat vazifalarini bajarish chog‘ida halok bo‘lgan hamda harbiy xizmat vazifalarini bajarish chog‘ida yaradorlik, kontuziya, shikastlanish yoki kasalliklar oqibatida nogiron bo‘lib qolgan O‘zbekiston Respublikasi Qurolli Kuchlari tarkibiga kiruvchi vazirliklar va idoralarning ofitserlari, serjantlar va oddiy askarlar tarkibiga mansub bo‘lgan kontrakt bo‘yicha harbiy xizmatchilari farzandlariga beriladi.
Tavsiyanomalarni berish masalasini ko‘rib chiqish uchun O‘zbekiston Respublikasi Qurolli Kuchlari tarkibiga kiruvchi vazirliklarda vazirlik rahbarining tegishli masalalar bo‘yicha o‘rinbosari raisligida komissiya tuziladi.
Kamida besh nafar rahbar xodimlar va vakolatli mutaxassislardan iborat bo‘lgan komissiya O‘zbekiston Respublikasi Qurolli Kuchlari tarkibiga kiruvchi vazirlik (idora) rahbarining buyrug‘i bilan tasdiqlanadi.
