TOShKENT, 16-iyun — Sputnik. Xalq deputatlari Farg‘ona viloyat kengashining navbatdan tashqari sessiyasida viloyat hokimiga o‘rinbosarlar tayinlandi. Bu haqda viloyat hokimligi matbuot xizmati xabar berdi.
Sessiya qaroriga ko‘ra, Farg‘ona viloyat hokimining iqtisodiyot va tadbirkorlik masalalari bo‘yicha birinchi o‘rinbosari Qo‘chqorov Sadriddin Burxonovich o‘rniga Ortiqov Akmalxon Jo‘raxonovich hamda qishloq va suv xo‘jaligi masalalari bo‘yicha o‘rinbosari Tursunov Alibek Ma’murjonovich o‘rniga Teshayev Shuhrat Jo‘raqulovich tayinlanganligi bir ovozdan ma’qullandi.
Xabarda aytilishicha, yig‘ilishda viloyat hokimining yangi tayinlangan o‘rinbosarlari prezident e’tiboriga tushgan, yuqori bilim va kasbiy tajribaga ega, mehnat faoliyati davomida samarali ishlagan eng yaxshi kadrlardan ekanligi alohida ta’kidlab o‘tildi.
"Sessiya yakunida deputatlar hamda yangi tayinlangan o‘rinbosarlar so‘zga chiqib, o‘zlariga bildirilgan ishonchni oqlash va zimmalariga yuklatilgan vazifalarni mas’uliyat bilan bajarishga va’da berdilar", — deyiladi xabarda.
Sessiyada O‘zbekiston bosh vaziri Abdulla Aripov hamda prezidentning davlat maslahatchisi Umar Ismoilovlar ishtirok etdilar.
