TOShKENT, 21 apr — Sputnik. O‘zbekiston tashqi ishlar vaziri Abdulaziz Kamilov rahbarligidagi delegatsiya 2018-yilning 23-25 aprel kunlari Xitoy Xalq Respublikasiga tashrif buyuradi.
Bu haqda O‘zbekiston TIV matbuot xizmati xabar berdi.
O‘zbekiston delegatsiyasi 23-24-aprel kunlari Pekin shahrida Shanxay hamkorlik tashkilotiga a’zo davlatlar Tashqi ishlar vazirlari kengashining navbatdagi majlisida ishtirok etadi.
"Hindiston Respublikasi, Pokiston Islom Respublikasi, Qirg‘iziston Respublikasi, Qozog‘iston Respublikasi, Rossiya Federatsiyasi, Tojikiston Respublikasi, Xitoy Xalq Respublikasi va O‘zbekiston Respublikasi TIV rahbarlari Sindao shahrida (XXR) Xitoy raisligida bo‘lajak ShHT Sammitiga tayyorgarlik masalalarini muhokama qiladilar", — deyiladi xabarda.
Tashrif davomida O‘zbekiston delegatsiyasi tomonidan Pekin shahrida ikki tomonlama uchrashuvlar o‘tkazish rejalashtirilgan.
