TOShKENT, 13 apr – Sputnik. Toshkent shahar hokimligi axborot xizmati keyingi paytda ayrim xorijiy nashrlar, internet saytlari poytaxtda hamshira va vrachlar majburan tozalik ishlariga jalb qilinayotganligi to‘g‘risida maqolalar chop etayotganini bildirdi hamda Mirzo Ulug‘bek tumanidagi 8-oilaviy poliklinika vrachlari haqidagi maqolaga raddiya berdi.
Ma’lum qilinishicha, Mirzo Ulug‘bek tumanidagi 8-son oilaviy poliklinikasi xodimlari ham tuman aholisi singari umumxalq hasharlarida, obodonlashtirish va ko‘kalamzorlashtirish ishlarida faol qatnashib, doimo o‘z hissalarini qo‘shib keladilar. Xodimlar poliklinika hududlarini tozalash ishlarini faqat shanba kunlari, ya’ni "ozodalik kuni"da ishdan tashqari vaqtda bajaradilar.
Oilaviy poliklinika ikkinchi umumiy amaliyot bo‘limi mudiri Gulchehra Saidovaning aytishicha, oilaviy poliklinika hududini tozalash ishlarida faqat kichik va o‘rta tibbiy xodimlar, xo‘jalik ishlarini yurituvchi xodimlar jalb qilinadi va ular o‘z maxsus kiyimlarida tozalash ishlariga qatnashishlari mumkin. Shifokorlar obodonlashtirish va tozalash ishlariga jalb qilinmaydilar. Qolaversa hech qanday majburlashlar yo‘q.
