TOShKENT, 30 mar — Sputnik. "Skripal ishi" tufayli qator mamlakatlar Rossiya diplomatik vakolatxonalari vakillarini chiqarib yuborgan edi. Bu choralarga javob tarzida Moskva ham qator mamlakatlar diplomatlarini chiqarib yubormoqda.
Ushbu choralar javob chorasi xarakteriga ega. Xususan, Rossiyani 13 nafar Ukraina diplomatlari, to‘rt nafar Polsha, uch nafardan Litva va Chexiya hamda bir nafar Latviya diplomatlari tark etishlari lozim.
Shuningdek, Niderlandiya diplomatik missiyasining ikki xodimi, bir nafar Shvetsiya xodimi hamda Estoniya harbiy attashesi Toomas Peda tark etadi.
Ularning barchasi 5-7 aprel sanalariga qadar Rossiyadan chiqib ketishlari lozim.
Shuningdek, Rossiya TIV Londondan diplomatlar va ma’muriy xodimlar sonini Britaniyada faoliyat yuritayotgan rossiyaliklar soniga tenglashtirishni talab qilmoqda. Bu uchun Londonga bir oy vaqt berilmoqda.
Skripal ishi
To‘rtinchi mart kuni Razvedka bosh boshqarmasi sobiq polkovnigi Sergey Skripal va uning qizi Yuliyani Britaniyaning Solsberi shahri markazida hushsiz holatda topishadi. Britaniya hukumatiga ko‘ra, sobiq agent sovet davrining "Novichok" dasturi doirasida ishlab chiqarilgan modda bilan zaharlangan. Shu bilan birga SSSRda bu nomli kimoviy qurol bo‘lmagan, toksinlarni belgilash uchun raqamlar ishlatilgan.
Umumiy hisobda diplomatik vakiolatxonalarni Rossiya TIVning 150dan ortiq xodimlari tark etishadi.
Eslatib o‘tamiz, ilgariroq Rossiya TIV amerikalik elchi Jon Xantsmanni chaqirtirgan edi. AQSh elchisiga oltmish nafar amerikalik diplomatlar Rossiyadan chiqarib yuborilishi va Sankt-Peterburg shahridagi AQSh vakolatxonasi yopilishi haqida e’lon qilindi.
