TOShKENT, 13 mar — Sputnik, Dilshoda Rahmatova. O‘zbekiston Ichki ishlar vaziri o‘rinbosari, Toshkent shahar Ichki ishlar bosh boshqarmasi rahbari Rustam Jo‘rayev IIB va xalq o‘rtasida chegara borligini tasdiqladi, deb xabar berdi Sputnik muxbiri. Jo‘rayev bu haqda 9-mart kuni bo‘lib o‘tgan ochiq muloqot davomida aytib o‘tdi.
Tadbir davomida jurnalistlar IIBB rahbariga "Militsiya xodimlariga nisbatan xalq ishonchi sezilmayapti? Siz buning boisi nimada deb o‘ylaysiz", degan savol bilan murojaat qilishdi.
General-mayor bu savolga javob berar ekan, huquqni muhofaza qilish organlari va jamoatchilik munosabatlari nafaqat jurnalistlarni, balki xalqaro olimlarni ham qiziqtirishini ta’kidladi.
"IIB va xalq o‘rtasida chegara bor. Ammo bu xodimlar boshqa davlatlardan kelib qatorimizga qo‘shilmagan, ular o‘zimizning odamlar. Ichki ishlar xodimlarining har biri o‘z vazifasini sidqidildan, qonunan bajarishi kerak. Shundagina chegara yo‘qoladi", — ded IIBB rahbari. Ichki ishlar xodimlarining asosiy kamchiligi haqida to‘xtalar ekan, general-mayor "Ichki ishlar xodimlariga balki ezgulik yetmaydi", degan fikrni aytdi.
"Xalq bizga himoyachi sifatida qarashiga erishishishmiz kerak", — deb qo‘shimcha qildi u.
O‘zbekiston Respublikasi ichki ishlar vazirining o‘rinbosari Rustam Jo‘rayevning ommaviy axborot vositalari vakillari bilan ochiq telemuloqoti O‘zbekiston prezidentining 2018-yil 14-fevral kunidagi "Toshkent shahrida jamoat tartibini saqlash, huquqbuzarliklar profilaktikasi va jinoyatchilikka qarshi kurashishning sifat jihatidan yangi tizimini joriy etish to‘g‘risida"gi qaroriga muvofiq tashkil etildi.
Kelgusida huddi shunday uchrashuvlar Toshkent aholisi va mehmonlari bilan har o‘n kunda o‘tkazib turiladi.
