TOShKENT, 6 fev – Sputnik. Buxoro viloyatining Kogon tumanida “Matiz” avtomobiliga o‘rnatilgan gaz balloni portlashi oqibatida ikki kishi qurbon bo‘ldi, deb xabar qilmoqda Tergov departamenti.
“2018 yil 02-fevral kuni soat taxminan 22:30da Buxoro viloyati, Kogon tumanida joylashgan “ZELIC OIL GAZ” MChJga tegishli avtomobillarga gaz qo‘yish shoxobchasi oldida “Matiz” rusumli avtomashinaning gaz balloni portlashi natijasida avtomashinada bo‘lgan 2 nafar fuqaro og‘ir tan jarohati olib vafot etgan”, — deyilgan xabarda.
Ushbu holat yuzasidan O‘zbekiston JKning 259 moddasining 2 qismi bo‘yicha — yong‘in xavfsizligi qoidalarining shu qoidalar bajaralishi uchun mas’ul bo‘lgan shaxs tomonidan buzilishi oqibatida odam qurbon bo‘lishiga olib kelishi, jinoyat ishi qo‘zg‘atilgan.
Xabarda aytilishiga ko‘ra, “Matiz” avtomobiliga metan gaz balloni o‘rnatilgan bo‘lgan.
Ma’lumot uchun, metan gaz ballonida gaz bosimi o‘ta yuqori- 200-250 atmosfera bo‘ladi, (propan gaz ballonida 10-16 atmosfera) shuning uchun ballonga yuqori xavfsizlik talablari qo‘yiladi.
Eslatib o‘tamiz, O‘zbekistonda 2018-yilning 1-fevralidan boshlab II, III, va IV markali, kompozit gaz ballonlaridan foydalanish ta’qiqlangan. Faqat I turdagi, to‘liq metalldan yasalgan ballonlardan foydalanish mumkin.
