TOShKENT, 1 fev – Sputnik. O‘zbekiston va Saudiya taraqqiyot fondi o‘rtasida O‘zbekiston qishloq joylarida uy-joylar qurish uchun 50 mln dollarlik zayom kelishuvi imzolandi.
Mazkur mablag‘ "Navoiy, Farg‘ona va Toshkent viloyatlaridagi qishloq joylarida zamonaviy uy-joylar qurish" loyihasini amalga oshirish uchun yo‘naltiriladi. Bu haqda O‘zbekiston Investitsiyalar bo‘yicha davlat qo‘mitasining ijtimoiy tarmoqdagi sahifasida ma’lum qilindi.
Hujjat O‘zbekiston delegatsiyasining Saudiya Arabistoniga amalga oshirgan tashrifi doirasida imzolangan.
Loyihaga ko‘ra, respublikaning yuqorida aytib o‘tilgan uchta viloyatidagi qishloq joylarida 2 mingdan ortiq namunaviy loyihadagi uylar quriladi.
Shuningdek, kelishuv doirasida suv, gaz, elektr ta’minoti, yo‘l tarmoqlarini qurish orqali mavjud infrastruktura yaxshilanadi, ijtimoiy markaz va sport maydonchalari, maktab, tibbiyot muassasalari, savdo majmualari va avtobus bekatlari ham bunyod etiladi.
