TOShKENT, 5 yanv – Sputnik. O‘zbekistonda 2018-yilning 1-yanvaridan boshlab yuridik shaxslar uchun daromad solig‘i 14%ni tashkil qiladi, deyilgan RIA Novosti xabarida.
“Rasman daromad solig‘i 7,5 %dan 14 %gacha oshirildi, lekin shu bilan birga obodonlashtirish va ijtimoiy infratuzilmani rivojlantirish solig‘i (8%) bekor qilindi”, — dedi Soliq qo‘mitasi vakili.
Qo‘mita vakili aytishiga qaraganda, o‘tgan yillarda O‘zbekistonda faoliyat yurituvchi yuridik shaxslar olgan daromadlaridan ikkita soliq to‘lar edilar – daromad solig‘i va obodonlashtirish va ijtimoiy infratuzilmani rivojlantirish solig‘i. Ushbu ikkala soliqlar bazasi bir xil bo‘lgani tufayli, ular yagona daromad solig‘i sifatida umumlashtirildi.
Shuningdek, 2018-yilda soliqchilik sohasida yana bir qator o‘zgarishlar kiritildi. Xususan, ommaviy tomoshalar, konsertlar tashkillashtiradigan korxonalar faoliyatidan olinadigan daromad solig‘i 35 %dan 14 %gacha kamaytirildi.
Tijorat banklari faoliyatidan olinadigan daromad solig‘i esa – 22 % miqdorida saqlab qolindi.
Uyali aloqa sohasida faoliyat yurituvchi korxonalar uchun o‘zgaruvchan daromad solig‘i miqdori ham oshirildi. Xususan, aloqa operatorining rentabellik darajasi 20%dan kam bo‘lsa, u 14 % soliq to‘laydi, rentabellik darajasi 20%dan oshgan taqdirda, oshgan miqdoridan – 50% daromad solig‘i olinadi.
O‘zbekiston iqtisodiy hayotining turli jabhalariga taaluqli o‘zgarishlar 29-dekabr kuni imzolangan 3454-sonli prezident karorida belgilangan.
