TOShKENT, 15 dek — Sputnik. Futbol bo‘yicha jahon chempioni bo‘lgan argentinalik sobiq futbolchi Diyego Maradona "Real" klubi hujumchisi Krishtianu Ronalduning o‘zini "tarixda eng yaxshi futbolchi" deb aytgan so‘zlariga fikr bildirdi. RIA Novosti xabariga asosan.
Ronaldu dekabrda 2017-yilning eng yaxshi o‘yinchisi sifatida "Oltin to‘p" sovrinini qo‘lga kiritdi. Bu uning beshinchi oltin to‘pidir.
Ronaldu France Football jurnaliga bergan intervyuda "o‘zimdan ko‘ra mukammal bo‘lgan o‘yinchi yo‘q" va o‘zini tarixda eng yaxshi o‘yinchi deb atadi.
Maradona "As" nashriga Ronalduning so‘zlari bo‘yicha berilgan savolga javob qaytardi. "Unga aytib qo‘yinglar, hazil qilishni bas qilsin", — deya ta’kidladi Maradona.
Maradona o‘zining eng yaxshi o‘yinchilar ro‘yxatida Alfredo Di Stefano, Yoxan Kroyff va Lionel Messini sanab o‘tdi.
