TOShKENT, 13 dek — Sputnik. Issiq-Ko‘l — noyob ko‘l, o‘zbekistonliklar uzoqlarga emas, mana shu qo‘shni davlatdagi ajoyib dam olish maskanida hordiq chiqarishlari uchun temir yo‘l qatnovini yo‘lga qo‘yishga kelishdik, dedi jurnalistlar bilan uchrashuvda chorshanba kuni O‘zbekiston prezidenti Shavkat Mirziyoyev.
Mirziyoyev o‘z nutqi davomida, shuningdek, bugungi muzokaralar davomida ikki mamlakat o‘rtasida avtobuslar qatnovi yo‘lga qo‘yilishi, Toshkent-Bishkek aviareysidan tashqari, Toshkent-O‘sh yangi aviareysini tashkil qilish haqida ham kelishuvlar bo‘lganini ma’lum qildi.
Ilgariroq, ikki tomonlama munosabatlarni rivojlantirish yo‘lidagi ulkan xizmatlari uchun Shavkat Mirziyoyev Qirg‘izistonning "Danaker" ordeni bilan mukofotlangani haqida xabar bergan edik. Yuksak davlat mukofotlaridan bo‘lgan ushbu orden xalqlar o‘rtasida tinchlik, do‘stlik va hamkorlikni mustahkamlashga, millatlararo totuvlikni asrash, ilm-fanni rivojlantirish, milliy madaniyatlarni yaqinlashtirish va boyitishga katta hissa qo‘shgan insonlarga beriladi.
