TOShKENT, 4 dek — Sputnik. Qirg‘iziston Respublikasi prezidenti Sooronbay Jeenbekov mamlakat Qurolli kuchlari Bosh shtabi rahbari Rayiberdi Duyshanbiyevni qabul qildi, deb xabar berdi Qirg‘iziston prezidenti matbuot-xizmati.
Jeenbekov, shuningdek, sobiq prezident Almazbek Atambayev "Qirg‘iziston Qurolli kuchlarida qator ijobiy islohotlarni amalga oshirgani"ni ta’kidlab o‘tgan.
"Biz bugun kuchli, yaxshi jihozlangan armiyaga egamiz. Mamlakat mudofaasi uchun ko‘nglimiz to‘q bo‘lishi mumkin. Harbiy xizmatchilarni ijtimoiy muhofaza qilish bo‘yicha ishlar davom ettiriladi, respublikaning barcha viloyatlarida yangi va zamonaviy turar-joylarni qurishda davom etamiz", — deb qayd etdi davlat rahbari.
Qirg‘izistonning yangi saylangan prezidenti qurolli kuchlar tizimidagi korrupsiyaga qarshi kurash ham davom ettirilishi lozimligini qo‘shimcha qildi.
"Hukumatning barcha tarmog‘ida korrupsiyaga qarshi ayovsiz kurashni davom ettiramiz", — deb ta’kidladi Jeenbekov.
Jeenbekov o‘z so‘zi yakunida Bosh shtab rahbaridan ushbu yo‘nalishda ishlarni kuchaytirishni talab qilgan.
