TOShKENT, 2 dek — Sputnik. Jomboy tumani hokimi H.Bo‘riyev o‘z arizasiga binoan lavozimidan ozod qilindi, bu lavozimga viloyat hokimi T. Jo‘rayev tavsiyasiga ko‘ra, viloyat iqtisodiyot va hududlarni kompleks rivojlantirish bosh boshqarmasi boshlig‘i bo‘lib ishlagan Umidjon Nazarov tasdiqlandi.
Hokim tomonidan tumanda bolalarni maktabgacha tarbiya muassasalariga jalb etish qoniqarsiz holatdaligini qayd etgan.
Sessiyada shuningdek, yerdan foydalanishdagi o‘zibo‘larchilik keskin tanqid qilinib, xususan, almashlab ekish, yerni mineral va mahalliy o‘g‘itlarga to‘ydirish e’tibordan chetda qolayotgani qo‘shimcha qilingan. Buning ustiga, sug‘oriladigan maydonlarda o‘zboshimchalik bilan uy-joy qurish holatlari mavjud.
Viloyat hokimi o‘z nutqida yoshlar tarbiyasi, jinoyatchilikka qarshi kurash, ta’lim sifatini oshirish borasida ham foydalanilmayotgan imkoniyatlarni ishga solish yuzasidan mulohazalar bildirdi. Sektorlar ishida faollik va tashabbuskorlik yetishmayotgani qayd etilib, aholi bilan muloqot, ularning muammolariga yechim topishda to‘rt sektor faoliyati ham talab darajasida emasligi tanqid qilindi.
