TOShKENT, 2 dek — Sputnik. Toshkent harbiy okrugidagi dala-o‘quv maydonlaridan birida ko‘rgazmali taktik o‘quv mashg‘uloti bo‘lib o‘tdi. Bu haqda Mudofaa vazirligi matbuot xizmati xabar berdi.
Harbiy okrug tasarrufidagi batalon va divizon komandirlari hamda ularning o‘rinbosarlari uchun tashkil etilgan ko‘rgazmali taktik o‘quv mashg‘uloti avvalida o‘tkazilgan anjumanda slayd va ko‘rgazmali vositalar yordamida batalon taktik o‘quv mashg‘ulotlarini tashkil etish, bo‘linma komandirlarining jangovar harakatlarni boshqarish va ular orasida tajriba almashinuvini yo‘lga qo‘yish bo‘yicha yo‘l yo‘riqlar berildi.
Shundan so‘ng ko‘rgazmali taktik o‘quv mashg‘ulotlari dala o‘quv maydonida tashkil etilgan yigirmaga yaqin o‘quv joylarida davom ettirildi.
Mashg‘ulotlar davomida harbiy xizmatchilar oldiga shartli dushman kuchlarini murakkab tog‘ sharoitida yo‘q qilish vazifasi qo‘yildi. Bo‘linmalar mazkur vazifani muvaffaqiyat bilan yakunlashdi.
Taktik o‘quvlari so‘ngida mashg‘ulotlarda faol ishtirok etgan bir guruh harbiy xizmatchilarga okrug qo‘mondonligining faxriy yorliqlari tantanali ravishda topshirildi.
