TOShKENT, 18 noya – Sputnik. Sirdaryo viloyati va Qozog‘istonning Akmola viloyati o‘rtasida qator sohalarda hamkorlik qilish bo‘yicha memorandum imzolandi. Bu haqda Akmola viloyati hokimligi matbuot xizmati xabar berdi.
Xabarda aytilishicha, Akmola viloyati hokimligida Sirdaryo viloyati hokimligining rasmiy delegatsiyasi bilan uchrashuv o‘tkazildi.
Tomonlar ikki viloyat o‘rtasida iqtisodiyot va savdo, turizm, sog‘liqni saqlash, madaniyat va sport sohalarida hamkorlik qilish bo‘yicha memorandum imzoladi.
Viloyat tadbirkorlik va sanoat boshqarmasining ma’lumotiga ko‘ra, 2017-yilning yanvar-avgust oylarida Akmola viloyati va O‘zbekiston o‘rtasidagi savdo aylanmasi 44 524,7 ming dollarni tashkil etdi. Bu o‘tgan yilning shu davriga nisbatan 45,3 foizga ko‘pdir (2016 yil yanvar-avgust oylari — 28 778,5 ming dollar).
