TOShKENT, 14 noya — Sputnik. O‘zbekiston va Ispaniya o‘rtasida iqtisodiyot va sanoat sohalarida hamkorlik to‘g‘risidagi memorandum hamda ikki davlat savdo-sanoat palatalari o‘rtasida hamkorlik to‘g‘risidagi bitim imzolandi.
Bitim O‘zbekiston tashqi ishlar vaziri Abdulaziz Kamilov boshchiligidagi delegatsiyaning Madrid shahrida Ispaniyaning savdo bo‘yicha davlat kotibi Mariya Luisa Ponsela bilan uchrashuvi davomida imzolandi.
O‘zbekiston TIV matbuot xizmatining xabar berishicha, muzokaralar davomida hamkorlikni, avvalo savdo-iqtisodiy va investitsiya sohalarida yanada rivojlantirishning ustuvor yo‘nalishlari muhokama qilindi.
Uchrashuv va shu kuni bo‘lib o‘tgan O‘zbekiston va Ispaniya ishbilarmon doiralari vakillari ishtirokidagi biznes-forumda iqtisodiyotning turli sohalarida birgalikdagi va o‘zaro manfaatli yangi loyihalarni amalga oshirishning istiqbollari batafsil ko‘rib chiqildi.
Bugungi kunda O‘zbekiston va Ispaniya investitsion aloqalarni kengaytirish, o‘zaro tovar ayirboshlash hajmi va nomenklaturasi ko‘paytirish uchun yetarlicha imkoniyatlarga ega bo‘lib, 2017-yilning yanvar-iyul oylarida bu ko‘rsatkich 71,5 mln dollarni tashkil etdi.
