TOShKENT, 9 noya — Sputnik. Qashqadaryo viloyati Qamashi tumani Qo‘shko‘l qishlog‘i hududida o‘tkazilgan reyd davomida fuqaro Abdumurod Ibatov 54 tup noyob, bir necha yuz yil yashaydigan Zarafshon archasini o‘zboshimchalik bilan kesib, qurilayotgan xususiy savdo do‘koni omborxonasi tomini yopishga ishlatgani aniqlandi, deb xabar qildi Sputnik O‘zbekiston muxbiri.
Jinoyat ishlari bo‘yicha Qamashi tuman sudida bo‘lib o‘tgan sud majlisida A.Ibatov o‘z aybiga iqror bo‘lmasdan ustunlar eski edi, ularning 32 tasini bir necha yil ilgari qishloqdoshim E.Xushvaqtovning molxonasi buzilgan paytda chiqqan yog‘ochlar orasidan olganman, deb turib olgan. Biroq ekspertlar noyob archa daraxti yangi kesilganini qayd etishgan.
O‘zboshimcha do‘kondorning aybi to‘plangan boshqa bir qator dalillar orqali ham o‘z isbotini topgan.
Sud hukmi bilan A.Ibatovga ikki yil ozodlikdan mahrum qilish jazosi tayinlandi, ammo amnistiya sabab, u tayinlangan jazodan ozod etildi.
Archalar kesilishi oqibatida yetkazilgan zarar ayblanuvchidan hududiy Bioinspeksiya hisobiga undiriladigan bo‘ldi.
