TOShKENT, 24 okt — Sputnik. XIII xalqaro paxta va to‘qimachilik mahsulotlari yarmarkasi davomida O‘zbekiston tayyor va yarim tayyor to‘qimachilik mahsulotlar eksportiga oid 1 mlrd dollardan ortiq shartnomalar imzoladi, deb xabar qilmoqda Sputnik muxbiri.
Eng yirik qiymatli shartnomalar Rossiya, Turkiya, Janubiy Koreya, Singapur va Moldova davlatlari bilan imzolandi. Xorijiy kompaniya vakillari O‘zbekiston to‘qimachilik mahsulotlari sifati va narxini yuqori baholashdi. Shu bilan birga shartnomalar imzolash davom etmoqda va imzolangan shartnomalar bo‘yicha aniq raqamlar yarmarka yakunida e’lon qilinadi. Paxta tolasi borasida imzolangan shartnomalar qiymatlari ham yarmarka oxirida e’lon qilinishi kutilmoqda.
Eslatib o‘tamiz, o‘tgan yili bo‘lib o‘tgan xalqaro paxta yarmarkasi doirasida O‘zbekiston 1,32 mlrd dollarlik shartnomalar imzolagan edi. Bu yilgi xalqaro paxta yarmarkasiga dunyoning 50 mamlakatidan 1500 dan ortiq mutaxassislar kelishgan.
