TOShKENT, 20 okt — Sputnik. Toshkent viloyatida 2020-yil yakuniga qadar qurilish materiallarini ishlab chiqarish sohasida umumiy qiymati 1 mlrd dollardan ortiq 21 ta investitsiya loyihalari amalga oshiriladi. Bu haqda Sputnik muxbiri xabar qildi.
Shu kunlarda Vazirlar Mahkamasi 2020-yilga qadar Toshkent viloyatining qurilish materiallar ishlab chiqarish sanoatini yanada rivojlantirish to‘g‘risidagi manzil dasturini tasdiqladi.
Loyihalarning katta qismi sement tarmog‘i korxonalari tomonidan amalga oshiriladi. Jumladan, Rossiyaning "Yevrotsement grup" xolding kompaniyasi yiliga 2,4 mln tonna "quruq usulda" sement ishlab chiqarishni yo‘lga qo‘yish maqsadida 220 mln dollarlik mablag‘ni sarmoya sifatida kiritadi.
Bundan tashqari ikki dona sement zavod Xitoy sarmoyachilari tomonidan quriladi. Birinchi zavod Ohangaron tumanida Xin Lei korxonasi bazasida barpo etiladi. Ushbu zavod yiliga 108 mln dollarlik 1 mln tonna sement ishlab chiqarish quvvatiga ega bo‘ladi. Boshqa zavod "Ohangaronshifer" korxonasi bazasida tashkil qilinadi. Zavod yiliga qiymati 100 mln dollarlik 1 mln tonna sement ishlab chiqariladi.
Eronlik sheriklar ham chetda qolmaydi. Kashi Ehsan Maybod Co Pjs kompaniyasi tomonidan Toshkent viloyatining Yuqori Chirchiq tumanidagi EMG kompaniyasi bazasida yaltiroq keramik plitkalar ishlab chiqarish rejalashtirilmoqda. Sanoatning yillik quvvati 2,1 mln kvadrat metr bo‘ladi.
Vazirlar Mahkamasi hisob-kitoblariga ko‘ra, barcha loyihalarni amalga oshirish natijasida 3900 ta yangi ish o‘rinlari yaratilib, to‘g‘ridan-to‘g‘ri sarmoyalarning qiymati 519 mln dollarni tashkil qiladi.
