TOSHKENT, 14 okt — Sputnik. Oʻzbekiston hukumati mahalliy hokimiyatlarga 2017 yil 1 dekabrdan boshlab yangi avtomobillarga gaz quyish shoxobchalari (AGQSH) qurish uchun yer ajratishni taqiqladi, deb xabar berdi Sputnik muxbiri.
Bunda, mavjud AGQShlar bosqichma-bosqich ravishda avtomobillarga gaz toʻldirish kompressor stantsiyalariga (AGTKS) aylantiriladi. Yoqilgʻi quyish shoxobchalarini oʻzgartirishning batafsil rejasi shu yilning dekabr oyi oʻrtalariga qadar ishlab chiqiladi.
Uskunalar sotib olishni yengillashtirish va tannarxni kamaytirish maqsadida "Oʻzbekneftegaz" Janubiy Koreyaning NK Group kompaniyasi bilan hamkorlikda statsionar va koʻchma AGTKSlar uchun uskunalar, butlovchi va ehtiyot qismlarni ishlab chiqarish, shuningdek, ularga servis xizmati koʻrsatish boʻyicha qoʻshma korxona tashkil etadi.
2019 yil oxiriga qadar respublika boʻylab 178ta yoqilgʻi quyish shoxobchasini qurish rejalashtirilmoqda, eng koʻp shoxobchalar Toshkent viloyati —31ta va Qoraqalpogʻistonda – 25ta – quriladi. Mamlakatda hozirda 569ta shunday shoxobcha mavjud.
