TOSHKENT, 14 okt – Sputnik. Oʻzbekiston prezidenti Shavkat Mirziyoyev Xorazm viloyatiga tashrifini Urganch xalqaro aeroportida amalga oshirilgan ishlar bilan tanishishdan boshladi.
Urganch xalqaro aeroporti zamonaviy talablar asosida rekonstruktsiya qilingan. Bir soatda 300 yoʻlovchini kuzatish va 300 yoʻlovchini kutib olishga moʻljallangan terminallar, xizmat koʻrsatish xonalari, savdo shoxobchalari tashkil etilgan, yon-atrof obodonlashtirilgan.
"Davlatimiz rahbari topshirigʻiga muvofiq aeroportda rasmiy delegatsiyalar, xorijiy mehmonlarni kutib olish uchun zarur sharoit yaratilmoqda", deb yozadi prezident matbuot xizmati.
Shavkat Mirziyoyev amalga oshirilgan ishlar va galdagi rejalar bilan tanishdi. Aeroport faoliyatini takomillashtirish, mehmonlar uchun qulayliklarni yanada oshirish boʻyicha koʻrsatmalar berdi.
