TOSHKENT, 30 sen — Sputnik. Bugun Toshkentda navbatdagi Mercedes avtobusi yonib ketdi, deb xabar berdi Sputnik muxbiri.
Hodisa "Buyuk ipak yoʻli" metro bekati hududida Mirzo Ulugʻbek koʻchasida sodir boʻldi.
Guvohlarning aytishlaricha, avtobusning motor boʻlimi va yoʻlovchi salonining orqa qismi butkul yonib ketgan. Yoʻlovchilarning hech biri jarohatlanmagan.
Sputnik Oʻzbekiston ilgari ham poytaxtda avtobuslar yonib ketishi bilan bogʻliq hodisalar haqida yoritgan edi.
Hozirda barcha Mercedes-Benz avtobuslari oʻrniga MAN A 22SPG avtobuslaridan foydalanish masalasi koʻrib chiqilmoqda.
