TOShKENT, 19 sen — Sputnik. Toshkentda “O‘zbegim do‘ppilari” ko‘rgazmasi bo‘lib o‘tmoqda. Unda shaxsiy kolleksiyalardan o‘rin egallagan 211 dona do‘ppilar namoyish etilgan, deb xabar qilmoqda O‘zbekiston Madaniyat vazirligi matbuot xizmati.
O‘zbek do‘ppisi milliy madaniyatning ajralmas qismi hisoblanadi. "Do‘ppi"- so‘zining o‘zi turkiy "Tube" so‘zidan olingan bo‘lib, ust, yuqori degan ma’noni bildiradi.
O‘zbekistonda do‘ppilar bosh kiyim sifatida o‘rta asrlarda keng tarqaldi. Do‘ppi tikish san’ati qo‘ldan-qo‘lga, avloddan-avlodga, onadan-qiziga o‘tib me’ros bo‘lib kelmoqda. O‘zbekistonning har bir viloyatida o‘ziga xos do‘ppilar mavjud.
Surxondaryo va Qashqadaryoda dumaloq ko‘rinishdagi do‘ppilar, yorqin, bir-biridan keskin farq qiladigan iplar bilan tikilgan bo‘lsa, Buxoro do‘ppilari ko‘proq zar iplar bilan tikilgan. Shuni aytib o‘tish joizki, kelib chiqishiga qarab, Farg‘ona do‘ppilari qadimiyroq hisoblanadi. Shu bilan birga, Chust, Marg‘ilon, Qo‘qon, Andijon do‘ppilari ham mashhur bo‘lgan.
Iroqi do‘ppi Shahrisabzda keng urf bo‘lgan, keyinchalik boshqa joylarga tarqalib, har bir mahalliy joyning o‘ziga xos bezak usulida yaratila. Toshkent va Farg‘ona vodiysida keng tarqalgan iroqi nusxa do‘ppining naqsh mujassamoti rang-barang gulli novdalar, ular orasidagi yashil, ko‘k tusli qushcha (bulbullar) shaklidan iborat.
Do‘ppining barcha turdagi namunalarini O‘zbekiston Davlat san’at muzeyida, O‘zbekiston Davlat tarix muzeyida hamda O‘zbekiston amaliy san’at muzeyida uchratish mumkin.
“O‘zbegim do‘ppilari” nomli ko‘rgazmada shaxsiy kolleksiya to‘plamlaridan o‘rin egallagan 211 dona do‘ppilar, hamda taniqli rangtasvirchi rassomlar Ibrohim Valixodjayev, Dilshod Nazarov,, Dilshod Eshmatov, Shuxrat Abdumalikov, Alisher Umrzoqov va ko‘plab rassomlarning ishlari namoyish etilgan.
O‘zbekiston Respublikasi Madaniyat vazirligi tomonidan tashkil qilingan ko‘rgazma “Laylak qo‘ndi” madaniy me’ros binosida 2017 yilning 10-oktabrga qadar davom etadi.
