TOSHKENT, 14 sen — Sputnik. Oʻzbekiston kompaniyalari xorij mamlakatlar bozorlariga 6 mln dollarlik meva-sabzavot va dukkakli mahsulotlarni eksport qilish boʻyicha 5 ta shartnoma imzoladi, "Jahon" AA xabariga asosan.
Ushbu shartnomalar Latviya poytaxtida oʻtkazilgan Riga Food — 2017 xalqaro koʻrgazmasi doirasida imzolandi.
Oʻzbekiston mahsulotlari dunyoning 35 ta mamlakatlaridan kelgan 750 ta kompaniyalarga namoyish qilindi.
Riga Food — Yevropada eng yirik xalqaro koʻrgazmalardan biri hisoblanadi. Ushbu koʻrgazmada meva-sabzavot va oziq-ovqat mahsulotlar yetkazib berish, shuningdek, ularni ishlab chiqarish, qayta ishlash va saqlash sohasidagi yangiliklarning taqdimoti oʻtkaziladi.
Avgust oyi oxirida Oʻzbekiston-Latviya biznes forumida "Uztreyd" kompaniyasi Oʻzbekistonda ishlab chiqarilgan 10 mln dollarlik toʻqimachilik, meva-sabzavot mahsulotlarini yetkazib berish boʻyicha qator shartnomalarni imzolanganligi haqida xabar bergan edik. Oʻzbekiston va Latviya muzokaralari davomida Latviyada qoʻshma savdo uyini ochishga kelishib olindi.
