TOShKENT, 14 sen – Sputnik. Rossiyaning Birlashgan aviasozlar korporatsiyasi Il-114-300 samolyoti uchun yangi dvigatelni muvaffaqiyatli sinovdan o‘tkazdi, deb xabar qildi Bosh vazir o‘rinbosari o‘rinbosari Dmitriy Rogozin.
“Chiroyli dvigatel, u uzoq vaqt va to‘g‘ri uchadi”, — deb izoh qoldirdi Rogozin o‘zining Facebookdagi sahifasida sinovdan keyin.
Yangi dvigatelni sinovdan o‘tkazish uchun dastlab “uchar laboratoriya” nomini olgan Il-76LL samolyotini qayta ta’mirlashga to‘g‘ri keldi.
Yangi turboparrakli dvigatel — TV7-117ST hududiy aviaparvozlar uchun mo‘ljallangan Il-114-300 hamda yengil harbiy-transport samolyoti Il-112V samolyotlari uchun sinovdan o‘tkazilmoqda. Uning maksimal quvvati 3000 ot kuchi, favqulodda vaziyatlarda 3600 ot kuchiga yetishi mumkin.
Il-114-300 samolyotlari ishlab chiqarish Nijniy Novgorod shahridagi «MiG» korporatsiyasiga tegishli bo‘lgan “Sokol” zavodida yo‘lga qo‘yiladi. Yaqin bir necha yil ichida kamida 300 ta Il-114 samolyotlari ishlab chiqarish rejalashtirilgan.
2015 yilda Rossiya rahbariyati mahalliy yo‘nalishlar uchun samolyotga buyurtma bergan edi. Ushanda Dmitriy Rogozin jamoasi tomonidan Il-114 samolyotini Rossiyada ishlab chiqarish taklifi kiritilgan edi.
Ishlab chiqarish jarayonini tezlatish uchun Toshkent aviatsiya zavodida ishlatilmay qolgan 5 ta Il-114 planerlarini (korpus) sotib olish va kerakli texnik hamkorlikni yo‘lga qo‘yish haqida muzokaralar ham olib borilgan edi.
Eslatib o‘tamiz, Il-114 samolyoti texnik loyihasi 1980-yillarda Ilyushin konstruktorlik burosi tomonidan yaratilib, Toshkent aviatsiya zavodida ishlab chiqarish yo‘lga qo‘yilgan. Birinchi samolyotlar 1990-yilda paydo bo‘ldi, turli sabablarga ko‘ra ularni sertifikatsiya qilish jarayoni cho‘zilib ketdi va umuman ushbu samolyotlarga sobiq Ittifoq hududida talab kam bo‘ldi. 2012 yilga qadar 17 dona samolyot ishlab chiqarildi. Ayni damda ularning bir nechasi O‘zbekiston Havo Yo‘llarining ichki yo‘nalishlarida, Rossiyada va Ukrainada xizmat qilmoqda.
