TOShKENT, 9 sen — Sputnik. O‘zbekiston Markaziy banki eksportdan kelib tushgan chet el valyutasidagi tushumdan majburiy sotuv amalga oshirilishi yuzasidan tushuntirish berdi.
Bankning bildirishicha, O‘zbekiston prezidentining 2017-yil 2-sentabrdagi "Valyuta siyosatini erkinlashtirishning ustivor chora-tadbirlari to‘g‘risida"gi Farmoniga muvofiq, mulkchilik shaklidan qat’i nazar, barcha xo‘jalik yurituvchi subyektlar eksport amaliyotlari bo‘yicha kelib tushgan xorijiy valyutadagi tushumni majburiy tartibda sotishlariga qo‘yilgan talab bekor qilindi.
Yuqoridagi meyor qabul qilinishi munosabati bilan va majburiy sotuvni amalga oshirilishi yoki oshirilmasligi yuzasidan kelib tushayotgan savollarga javoban Markaziy bank 2017-yilning 5-sentabridan boshlab barcha tadbirkorlik subyektlari eksport qilinayotgan tovarlar (xizmatlar) turi va xo‘jalik yurituvchi subyektlarning mulkchilik shaklidan qat’i nazar, eksport amaliyotlari bo‘yicha kelib tushgan xorijiy valyutadagi tushumni majburiy tartibda sotishlariga qo‘yilgan talab bekor qilinganligini ma’lum qildi.
Bundan buyon eksportchilar eksportdan kelib tushgan o‘z valyuta mablag‘larini erkin tasarruf etish va hech qanday to‘siqlarsiz o‘z xohishlariga ko‘ra, joriy xalqaro to‘lovlarni amalga oshirish, shuningdek tovarlar (xizmatlar) importi uchun sarflashlari yoki milliy valyutadagi joriy xarajatlarni amalga oshirish uchun xizmat ko‘rsatuvchi bankka yoki valyuta birjasida (bank orqali) sotish huquqiga egadir.
