TOShKENT, 30 avg — Sputnik. Toshkentda birinchi uyushmagan yoshlar klubi tashkil qilindi, deb xabar qildi "Uz24uz" nashri.
Bu haqda fuqarolarni o‘zini —o‘zi boshqarish organlarining faoliyatini muvofiqlashtiruvchi Respublika kengashi raisi birinchi o‘rinbosari Shavkat Javlonov 30-avgust kuni bo‘lib o‘tgan Xalqaro press-klub yig‘ilishida ma’lum qilgan.
Klubga a’zo bo‘lish uchun hech qanday hujjat talab etilmaydi. "Pasport, propiska kerak emas", — deb aytgan Toshkent shahar mahalla kengashi raisi o‘rinbosari Davronbek Mirtojiyev. Ta’kidlanishicha faqat turmushga chiqqan ayollar uchungina cheklov mavjud. Mirtojiyevga ko‘ra, bu ayollarni erlari ta’minlashi kerak.
Uyushmagan yoshlarga amaliy yordam ko‘rsatish uchun davlat tomonidan klub a’zolariga 277 mlrd so‘m kredit ajratilgan. Klubning har bir a’zosi mahalla raisi imzosi orqali xususiy ishlab chiqarishini yo‘lga qo‘yish uchun 15 mln so‘m miqdorida kredit olish huquqiga ega.
Klub ikki oydan beri faoliyat yuritayotgani va yoshlarning ishga joylashishida amaliy yordam ko‘rsatib kelayotgani aytilgan. Ta’kidlanishicha. klubda yoshlar maxsus kurslarni bepul tugatishmoqda.
Ayni vaqtda klub faoliyati har payshanba kuni 17:00da boshlanmoqda.
"Umid qilamanki, ular klub a’zoligidan chiqishganlarida, hayotda o‘z o‘rniga ega bo‘lishadi. Fikrimcha bunday amaliyotni ommalashtirish darkor. Klublarni respublikaning barcha regionlarida tashkil qilish kerak bo‘ladi", — deb qo‘shimcha qilgan Javlonov.
